MANILA, Philippines – Naitarak ng College of St. Benilde ang pukpukang 24-26, 23-25, 25-12, 25-15, 15-10 panalo laban sa San Beda College upang umangat sa ikalawang puwesto sa NCAA Season 91 women’s volleyball tournament kahapon sa The Arena sa San Juan City.
Nanguna sa opensa at depensa si Jeanette Panaga na umiskor ng 21 puntos mula sa 12 attacks, anim na blocks at tatlong aces para tulungan ang Lady Blazers na makuha ang kanilang ikaapat na panalo.
Naramdaman din ang lakas ni Janine Navarro na pumalo ng 19 puntos gayundin si Ranya Musa na nagdagdag ng 17 puntos.
“The girls showed character,” sambit ni Lady Blazers coach Michael Carino.
Makakasalo ng Lady Blazers sa ikalawang posisyon ang nagdedepensang Arellano University Lady Chiefs tangan ang parehong 4-1 baraha.
Sila ay nasa ilalim ng nangungunang San Sebastian Lady Stags na may malinis na 5-0 marka.
Pinatumba rin ng Blazers ang Red Lions, 25-16, 23-25, 25-18, 25-21, sa men’s division ngunit hindi pumayag ang San Beda na mangyari ito sa juniors matapos igupo ng Red Cubs ang Benilde, 25-15, 25-14, 25-23.