MANILA, Philippines – Sumandal ang Mono Vampire Basketball Club sa matikas na laro nina Anthony McClain at Kannut Samerjai upang malusutan ang Pilipinas MX3 Kings, 76-74 kahapon sa Asean Basketball League na ginanap sa Chualongkorn University Stadium sa Thailand.
Nahawakan ng Mono Vampire ang 15-11 kalamangan sa unang kanto bago rumatsada sina Jason Deutchman at Eric Salamat ng 11-0 atake para agawin ng Kings ang bentahe sa pagtatapos ng ikalawang yugto, 22-17.
Ngunit mabilis na sumagot ang Mono Vampire nang makipagsanib-puwersa si McClain kina Jittaphon Towaroj at Samerjai tungo sa 40-37 bentahe sa pagsisimula ng third quarter.
Hawak ng Mono Vampire ang 74-71 kalamangan sa huling sandali ng laro matapos itarak ni McCain ang isang tres na siyang naging matibay na pundasyon nito upang makuha ang panalo.
Ito ang ikalawang panalo ng Mono Vampire para umangat sa 2-7 baraha habang nahulog sa 1-6 rekord ang Kings.