TANAUAN CITY, Batangas, Philippines – Pinaluhod ng Technological Institute of the Philippines ang Lyceum Northwestern University, 86-67, para kumuha ng silya sa main tournament ng National Collegiate Championship kahapon dito sa Faith Gym.
Umiskor si Jorey Napoles ng 12 points kasunod ang tig-10 nina Niño Ibañes at Terrence Tumalip para igiya ang Engineers sa Elite Eight ng annual tournament na inorganisa ng Philippine Collegiate Champions League.
Nauna nang tinalo ng TIP ang Mapua, 70-64, noong Martes at ang St. Clare Saints, 62-51, sa kanilang TIP Casal Gym sa Quiapo, Manila para itakda ang kanilang banggaan ng Lyceum na nanguna sa North Luzon qualifiers sa Dagupan, Pangasinan.
Makakasama ng TIP sa Elite Eight ang UAAP champion Far Eastern U, NCAA titlist Letran, NCAA runner-up at defending champion San Beda, UAAP second placer Santo Tomas University, CESAFI title-holder University of San Carlos at Vis-Min qualifier winner University of the Visayas.