MANILA, Philippines – Inangkin ng Far Eastern University-NRMF ang solong liderato nang takasan ang dating lider na Hobe Bihon-Cars Unlimited, 67-60 sa 5th DELeague Basketball Tournament sa Marikina Sports Center, Marikina City.
Tumapos si Prince Eze ng 14 puntos bukod pa ang siyam na rebounds, habang nagdagdag si Bright Akhuetie ng 12 puntos at siyam na rebounds para ibigay sa Tamaraws ang malinis na 3-0 karta, habang nahulog naman ang two-time defending champion Hobe sa 3-1 win-loss slate.
Mula sa huling deadlock sa 60-all, kumawala ang Tamaraws sa pagbagsak ng 7-0 run upang agawin ang trangko sa huling 2:39 nang sagupaan na hindi na binitiwan pa.
Sa isa pang laro, ibinandera ng 25 puntos at pitong rebounds ni Eric Rodriguez ang Sta. Lucia Land Inc. sa 82-79 pananaig laban sa Macways Travel sa ligang itinataguyod ni Marikina Mayor Del de Guzman na suportado ng PSBank, Accel Sportswear, PCA -Marivalley, Angel’s Burger at nina Mr. and Mrs. Dot Escalona .