MANILA, Philippines – Muling sasandalan ng Hapee ang talento ng kanilang manlalaro para madugtungan ang pagpapanalo na ginagawa sa PBA D-League Aspirants’ Cup ngayon sa Ynares Sports Arena sa Pasig City.
Kalaban ng Fresh Fighters ang MJM Builders sa ikalawang laro dakong alas-2 ng hapon at masosolo ng koponan ni coach Ronnie Magsanoc ang liderato na kasalukuyang pinagsasaluhan ng apat na teams.
Ang Jumbo Plastic Giants, Cagayan Valley Rising Suns at Café France Bakers ang iba pang may dalawang dikit na panalo sa liga.
Hindi pa nakakapag-ensayo ang Hapee ng kumpleto dahil karamihan sa kanilang manlalaro ay naghahanda para sa ligang sasalihan ng mga school teams.
Kahit ganito ang sitwasyon ay nanaig sila sa AMA University Titans (69-61) bago dinurog ang Tanduay Light (73-53).
Ikalawang panalo ang pakay ng Wangs Basketball at MP Hotel Warriors sa magkahiwalay na laro na kanilang haharapin.
Katunggali ng Wangs ang Racal Motors sa ganap na ika-12 ng tanghali habang ang Warriors ay makikipagsukatan sa Titans sa huling laro dakong alas-4.