MANILA, Philippines - Iniusog ng mga organizers ng 2014 Tempra Run Against Dengue ang karera mula Hulyo 20 sa Agosto 3 sa Cultural Center of the Philippines grounds para mabigyan ng panahong makapagpatala ng mga entries sa kolehiyo.
Hindi nakapagrehistro ang mga partner schools tulad ng Perpetual Help, Unibersidad de Manila at Pamantasan ng Pasay at iba pa dahil sa pagkakasuspinde ng mga klase sa loob ng 4 na araw dahil sa bagyong Glenda.
“Mahalaga ang partisipasyon ng mga estudenyante sa aming advocacy run, kaya binibigyan namin sila ng ganitong pagkakataon,” ani Matt Ardina, events director ng nag oorganisang Subterranean Ideas. “Bukod dito, inaasahan din naming maulan ang darating na mga araw. Ang kapakanan ng mga mananakbo ay aming pinapahalagahan.”
Ang mga kikitain sa Tempra run, suportado ng Philippine Charity Sweepstakes Office, Philippine Sports Commission, Maynilad, Mortein Naturgard, Medicard, Business Mirror, Health and Fitness Magazine, Toby’s, Vitwater, Banana Boat at Guard Insect Repellent, ay gagamitin para ipambili ng anti-dengue modalities na ipamimigay sa mga piling barangays.
Tuloy ang rehistrasyon sa Toby’s Arena sa Glorietta 2, Makati at Toby’s SM Manila.
Maaring tumawag sa (landline) 504-5990 o i-text ang (Sun) 0923-3323737, (Globe) 0916-2246221 at (Smart) 0918-2392009 para sa karagdagang detalye.