MANILA, Philippines - Magtatangka ang UE na bumangon mula sa pagÂlasap ng unang pagkatalo sa pagharap sa UST sa pagpapatuloy ngayon ng 76th UAAP men’s football sa FEU Diliman pitch.
Ang natatanging laro ay itinakda sa ganap na alas-3 ng hapon at inaasahang babalik din sa Red Warriors ang mahusay na striker na si Fitch Arboleda.
Inilabas si Arboleda sa first half ng laro laban sa FEU noong Biyernes dahil sa hamstring injury.
Bunga nito ay natalo ang UE sa Tamaraws sa dikitang 0-1 iskor at ibigay sa FEU ang unang puwesto sa 4-0 baraha at 12 puntos.
Hindi madaling laro ito dahil ang Tigers ay magnanais na makakawala sa pakikipagsosyo sa ikatlong puwesto kasama ang nagdedepensang Ateneo bitbit ang isang panalo, isang tabla at dalawang talo tungo sa apat na puntos.
Ang dating kampeon na UP at La Salle ay magkasalo sa ikalimang puwesto sa 1-0-2 tungo sa tatlong puntos habang ang National University ang nangungulelat sa 0-1-3 tungo sa isang puntos.
Ang laro sa kababaihan ay gagawin bukas (Sabado) sa pagitan ng UP at Ateneo sa ganap na ala-1 ng hapon at UST at FEU sa alas-3 ng hapon.