Rios pagreretiruhin si Pacquiao

MANILA, Philippines - Walang ibang nasa isip si Brandon ‘Bam Bam’ Rios kundi ang pagretiruhin si Filipino world eight-divi­sion champion Manny Pac­quiao.

Sinabi ng 27-anyos na si Rios (31-1-1, 23 KO’s) na kumpiyansa siyang ta­ta­lunin niya ang 34-anyos na si Pacquiao (54-5-2, 38 KO’s) sa kanilang non-title fight sa Nobyembre 24 sa The Venetian sa Macau, China.

“I have to go in there and show a different side of Brandon. I have to go in there and send Manny Pac­quiao into retirement,” sa­bi ni Rios.

Nauna nang natalo si Pac­quiao kina Timothy Brad­ley, Jr. (split decision) no­ong Hunyo 9 at Juan Ma­nuel Marquez (sixth-round KO) noong Disyembre 8, 2012.

Ayon kay Rios, kung na­nalo sina Bradley at Mar­quez kay Pacquiao ay ma­gagawa rin niya ito.

“Marquez beat him, Bradley beat him and now it’s my turn, and now it’s time for him to go ” sabi ni Rios sa Filipino boxing icon. “Out with the old and in with the new.”

Para magawa ito, ki­nuha ni Mexican chief trai­ner Robert Garcia si Alex Ari­za, dating strength and con­ditioning coach ni Pacquiao.