Laro Ngayon
(Treston College Gym,
The Fort, Taguig)
4p.m. AFP vs Congress/LGU
5:30 p.m. PhilHealth vs MMDA
MANILA, Philippines - Pagtutuunan ngayon ng Armed Forces of the Philippines (AFP) at PhilHealth ang puwesto sa semifinals sa paglarga ng 1st UNTV Cup quarterfinals ngayon sa Treston College Gym sa The Fort, Taguig City.
Unang sasalang ang AFP laban sa Congress/LGU sa ganap na ika-4 ng hapon bago sundan ng pagkikita ng PhilHealth at MMDA dakong alas-5:30.
Tumapos sa ikatlo at apat na puwesto, ang AFP (4-2) at PhilHealth (3-3) ay may bitbit na twice-to-beat advantage sa mga katunggali para mangailanga lamang ng panalo sa larong ito upang umabante na.
Ang Philippine National Police na hindi natalo sa elimination round (6-0) at Judiciary (4-2) ang nalagay sa unang dalawang puwesto para dumiretso na sa semifinals. Magtataglay din sila ng twice-to-beat advantage sa mga lulusot sa quarterfinals.
Naliliyamado ang AFP at PhilHealth matapos talunin ang Congress/LGU at MMDA sa mga iskor na 110-83 at 77-71, ayon sa pagkakasunod.