MANILA, Philippines - Naipasok ni Gio Ciriacruz ang mahalagang tres habang sablay naman ang pinakawalan ni Mike Silungan upang makuha ng Blackwater Sports ang 69-64 panalo laban sa Fruitas Shakers sa PBA D-League Aspirants’ Cup kahapon sa San Juan Gym.
Ang malayong buslo ni Ciriacruz ang bumasag sa huling tabla sa laro sa 60-all habang ang apat na dikit na puntos nina Jeric Fortuna at Kevin Ferrer ang nagtulak pa sa Elite na hawakan ang 67-62 kalamangan.
Idinikit ni Jason Escueta ang Fruitas sa tatlo bago nahiritan ng 24-seconds violation ang kalaban para bumalik ang bola sa baguhang team may 16 segundo sa orasan.
Ngunit dalawang beses sumablay ang pinakawalang tres ni Silungan at ang huling dalawang puntos ay inangkin ni Fortuna sa free throw line at ang tropa ni coach Leo Isaac ay umangat sa 2-1 baraha.
Sina Ferrer at Fortuna ay may 18 at 10 puntos habang 9 ang iniambag ni Ciriacruz na dating manlalaro ni Isaac sa Arellano University.
May 17 puntos si Carlo Lastimosa habang 14 puntos, 10 rebounds at 3 blocks ang ibinigay ni Adeogun para sa Fruitas na bumagsak sa 1-2 karta.
Nadugtungan naman ng NLEX ang winning run sa apat na sunod nang kunin ang 88-81 panalo sa Informatics Icons.
Nakitaan ng husay sa free throw shooting ang Road Warriors matapos makadikit ang Icons sa apat, 79-83, sa tres ni Brian Cruz, para ikasa rin ang ika-21 sunod na tagumpay.
May 16 puntos at 8 rebounds si Ian Sangalang para sa NLEX habang si Moncrief Rogado ay may 21 puntos para sa Icons na nalaglag sa 0-3 karta.