Ang arthritis ay pamamaga ng kasu-kasuan. May dalawang klase ng arthritis:
1. Osteoarthritis — Sa pag-edad, halos lahat ng tao ay nagkaka-osteoarthritis. Ang osteoarthritis ay pamamaga ng cartilage o butong-mura sa dulo ng mga buto dahil napudpod, kaya masakit at maga mula sa pagkiskis o paggalaw.
Ang dahilan ng pagkakaroon ng osteoarthritis ay maaring namamana, dating injury o pinsala, sobrang pagtatrabaho at pag-edad.
Kapag mataba o mabigat ka, mas magdidikit-dikit ang buto sa likod at tuhod dahil sa bigat ng katawan.
2. Rheumatoid arthritis — Ang rheumatoid arthritis ay sakit sa immune system kaya namamaga ang lining ng kasu-kasuan.
Ang mga dapat kainin kapag may rheumatoid arthritis ay mga pagkaing laban sa pamamaga tulad mga pagkaing mayaman sa omega-3 fatty acids tulad ng tawilis, tamban, dilis, hasa-hasa, galunggong, at talaba.
Kumain din ng mga antioxidants o mayaman sa vitamin C tulad ng papaya, kalamansi, suha, repolyo, kamatis, bayabas, mangga, berdeng sili (bell pepper) at singkamas.
Kumain ng may beta-carotene o vitamin A gaya ng mga dilaw na gulay at prutas, kamote, mangga, papaya, at kalabasa.
Dagdagan din ang pagkain ng may vitamin D para tumibay ang buto gaya ng pula ng itlog, talaba, sardinas, tawilis, tumban, soya milk at kabute.