ANG urinary tract infection (UTI) ay impeksiyon sa kidneys, ureters, bladder (pantog) at urethra. Ang gamutan sa UTI ay antibiotics. Ipinapayo kong baguhin ang inyong lifestyle o kinagawian sa buhay.
Gumamit ng mild soap o hindi matapang na sabon na panlinis ng puwerta. Sa mga babae, ang tamang pagpunas sa pag-ihi ay simula sa harap muna papuntang puwitan. Mali kung simula sa puwitan papuntang harapan.
Uminom nang maraming fluids para ma-flush out ang mga bacteria.
Magsuot ng mas maluwag na pantalon at cotton na underwear para mas mahangin.
Habang naka-antibiotics, mainam kumain ng yogurt.
Ang pyelonephritis naman ay impeksiyon sa kidney mula sa bacteria. Ang pasyente ay nilalagnat, masakit ang balakang, madalas umihi, o merong dugo sa ihi.
Pag may bato sa bato (kidney stones), magbawas sa matinding ehersisyo tulad ng mahabang pagtakbo.
Sa urine test o urinalysis, sinasahod ang midstream o gitnang labas ng ihi na may daming 10 ml at ibibigay sa laboratoryo.
Problema sa pag-ihi:
Kapag nahihirapang umihi, maaaring may kaba o depende sa lokasyon kung saan umiihi.
Sa lalaki, puwedeng lumaki ang prostate gland at naiipit ang tubo sa pag-ihi, o may kanser sa prostate o prostatitis. Puwede rin na may problema sa urethra dahil may impeksiyon, sugat o dumaan na bato.
Kapag madalas umiihi (polyuria), maaaring dahil uminom ng kape, tsaa, alak, buntis, natatakot, o may impeksiyon sa pantog.
Ang may diabetes ay madalas maihi, may rashes at yeast infection, at minsan ay may bladder prolapse o buwa (pelvic organ prolapse). Kung umiinom ng gamot na pampaihi, madalas ding mapapaihi.
May pagkakataon ng konti ang ihi (oliguria) pag may glomerulonephritis, kidney failure o dehydration kung nagtatae.
Dagdag kaalaman:
Ang glomerulonephritis ay pagkasira ng pansala (Glomeruli) ng kidneys. Maaring bigla o acute glomerulonephritis, o matagal o chronic glomerulonephritis.
Ang prostatitis ay impeksiyon sa prostate.