Sa hirap ng buhay sa trabaho’y sabwatan
may nasa sa labas iba’y nasa loob naman?
Aalis at darating sa ‘ting paliparan -
malaking abala ang nararanasan!
Maysakit at wala ngayo’y napipigil
sa tanim na bala ng mga taksil;
ang bala ay patagong itinatanim
at ito ay huli kapag ineksamin!
Pasaherong nahulihan ng bala
hinihingan ng padulas pagdaka;
kung di-makabigay detenido siya
di-makabibiyahe at ikukulong pa!
Dahil nagtatanim sila’y magsasaka
hindi sa bukirin kundi sa NAIA;
ito ay malaking kahihiyan ng bansa
sa lahat ng Pinoy ito ay tumama!
Bakit ito’y nagaganap sa Philippines
gayong tayong Pinoy may malinis na damdamin?
at marahil mga leaders dapat na sisihin
at empleyado’y dapat na suriin!
Dagdagan ng sweldo ang airport employees
at kamay na bakal ipatupad lagi;
kahihiyan natin ay baka mabawi
saka sa eleks’yon ibagsak ang mali!
Ang NAIA matagal nang tampulan ng puna
kayarian nito ay kasumpa-sumpa;
dapat noon pa man ito ay marangya
dahil ngalan nito kay Ninoy nagmula!
Naiibang magsasaka ngayo’y nagtatanim
sa kanilang asal ay dapat walisin;
mga lider nila ay isama na rin
hindi bala gulay-gulay dapat anihin.