PARA patunayan ng sindikato ng droga na hindi agad sila naaamoy ng mga pulis, mismong sa mga kabahayan na nasa likod ng Camp Crame sa Quezon City sila naglungga. Hindi na sila lumayo pa para makapag-operate ng illegal na negosyo. Parang hinamon ng sindikato ang kakayahan ng Philippine National Police kung hanggang saan nakaaabot ang pang-amoy ng mga ito.
Imagine, sa likod mismo ng Camp Crame na headquarters ng PNP nagtayo ng 12 drug dens ang sindikato. Sa drug dens na ito malayang nakagagamit ng shabu ang sinumang gustong magpakabangag --- kabataang estudyante, propesyunal, dyipni at traysikel drayber at kung sinu-sino pa.
Pero natunugan ang illegal na gawain. Sinalakay ng Anti-Illegal Drug Special Operation Task Force ang lugar at natimbog ang 33 tao (babae at lalaki). At ang nakadidismaya, isang pulis pala ang nagmi-maintain ng drug dens. Kaya naman pala walang mahuli sa lugar ay dahil pulis pala ang namamahala sa drug dens. Laging may nakakatunog at nagti-tip sa raiders kaya walang natitimbog. Hindi nga masusugpo ang droga sa lugar sapagkat ang inaasahang huhuli sa sindikato ng droga ay siya palang nangangalaga rito.
Nakilala ang pulis na si Police Officer 2 Ronaldo Baltazar na naka-assigned sa PNP Headquarters Support Service. Inihahanda na ang kasong isasampa sa corrupt na pulis. Dapat sibakin agad siya sa puwesto
Ang mga katulad niya ay hindi dapat sa serbisyo.
Kailangan ang puspusang pagkilos ni PNP chief Dir. Gen. Ricardo Marquez para maalis sa puwesto ang mga pulis na sangkot sa illegal drugs. Basagin niya ang mga bugok para wala nang pamarisan. Talamak na ang problema sa illegal na droga na nagwawasak hindi lamang sa mga kabataan kundi pati na rin sa iba pang tao sa lipunan. Kung mawawala ang mga pulis-droga, nakasisigurong mababawasan ang problema ng bansa.