Ano ang solusyon sa Mindanao problem?
Unang dapat gawin ang gobyerno’y pakilusin
Upang itong bansa’y lumigaya mandin
Kapagka nakitang tayo’y mahal pa rin!
At totoo namang kung may digmaan nga
doon sa Mindanao, bayan ang kawawa;
itong mamamayang tiwasay, payapa ·
naliligalig man ay walang magawa!
Natatakot sila na kung bigo, ito
hindi masawata ng ating gobyerno.
baka kaguluha’y makasapit dito
sa Luzon, Bisaya at saka sa Metro!
Kapagka ganito, dapat kumilos na,
mga kawal nating hawak ay sandata;
doon sa Mindanao ay magsipagmartsa,
lipulin nang lahat mga terorista!
Kung di malilipol ang mga bandido,
lalo pang darami mga pangkat nito;
ang kamay na bakal dapat nang ibato
ni President Noynoy sa mga dorobo!
May nagmumungkahing ang batas militar
ay pairalin na sa buong Mindanao;
kung gagawin ito ay parang sinampal
ang ating AFP na naging mabagal!
Kay President Noynoy iminumungkahi,
palakasin niya, AFP-PNP;
ang mga sibilyan, turuang mag-ani
nang saganang bigas, mais at kamote!