MANILA, Philippines — Patay ang isang streetsweeper matapos na saksakin ng may-ari ng kanyang inuupahang bahay habang nagwawalis sa kalsada kahapon ng umaga sa Quezon City.
Idineklarang dead on arrival sa Rosario Maclang Hospital ang biktimang si Catherine Ramirez Madrid, 43, residente ng Sitio San Gabriel, Brgy Batasan Hills, Quezon City.
Nasa kustodiya naman ng Quezon City Police District-Criminal Investigation and Detection Unit (QCPD-CIDU) ang suspek na si Guillermo Pialago Agravante, Sr. 76, biyudo, ng 21-D Area Talanay, Brgy. Batasan Hills, Quezon City.
Sa imbestigasyon, nangyari ang insidente dakong alas-6 ng umaga sa Kagawad Road corner Roadman Street, Brgy Batasan Hills, Quezon City.
Nagwawalis sa nasabing lugar ang biktima nang bigla na lamang lapitan ng suspek at sinaksak.
Agad na tumakas ang suspek dala ang patalim na ginamit.
Lumilitaw na dating nangungupahan ang biktima kasama ang live-in partner na si Jonathan Meneses Cajuto sa pinauupahang bahay ni Agravante.
May naiwang utang na P400 ang biktima sa suspek na paulit ulit nitong sinisingil.
Ayon sa pulisya posibleng ikinagalit ng suspek ang hindi pagbabayad ng biktima ng utang.
Sa follow up operation nadakip ang suspek na ngayon ay nahaharap sa kasong murder.