MANILA, Philippines — Nabuking na may kinakaharap palang kasong kriminal ang isang babae nang magtangkang kumuha ng police clearance sa Pasig City Police kamakalawa.
Kaagad namang inaresto ng mga awtoridad ang suspek na kinilala lang ni Pasig City Police chief PCol Celerino Sacro Jr. ang naarestong suspek sa alyas na “Tricia”, 44, ng Brgy. Pinagbuhatan, Pasig City.
Batay sa ulat ng pulisya, dakong alas-12:22 ng hapon nang maaresto ang suspek ng joint personnel ng Warrant and Subpoena Section, Clearance Section at Station Intelligence Section.
Nauna rito, nagtungo umano sa tanggapan ng pulisya ang suspek at nagtangkang kumuha ng police clearance.
Gayunman, kaagad na siyang inaresto ng mga awtoridad matapos na lumitaw sa kanilang record na siya ay may nakabinbin palang kaso sa hukuman at may standing alias warrant of arrest na inisyu ni Eugenio dela Cruz, presiding judge ng Pasay City Regional Trial Court Branch 117 noong Marso 25, 2019, dahil sa kasong paglabag sa PD 1866 o Illegal Possession of Firearms and Ammunitions.
Nagtakda ang hukuman ng P120,000 piyansa para sa pansamantalang kalayaan ng suspek.