MANILA, Philippines — Inaresto ng mga awtoridad ang isang sikat na celebrity doctor na wanted sa kasong 2 counts ng rape sa isinagawang operasyon sa basement parking area ng isang condominium unit sa Mandaluyong City nitong Biyernes.
Kinilala ni Mandaluyong City Chief of Police P/Sr. Supt. Moises Villaceran Jr., ang nasakoteng suspect na si Dr. Joel Mendez.
Bandang alas-11:30 ng tanghali, ayon kay Villaceran nang arestuhin si Mendez ng mga intelligence units, Tactical Motorcycle Riders ng Womens and Children Protection Desk at Mobile Patrol Unit ng Mandaluyong City Police sa basement parking area ng BSA Twin Tower ng Mandaluyong City kaugnay ng kasong 2 counts of rape na isinampa laban dito may apat na taon na ang nakalilipas.
Inihayag ng opisyal na nasakote si Mendez matapos ang ilang buwang surveillance operation laban sa celebrity doctor kaugnay ng warrant of arrest na inisyu ni Judge Imelda Portes-Saulog ng Regional Trial Court (RTC) Branch 214 sa kasong 2 counts ng rape.
Nabatid pa na matapos na masampahan ng kaso ng kaniyang biktima ay nagtago na sa batas si Mendez hanggang sa maispatan ito ng tipster ng pulisya na nagresulta sa kaniyang pagkakaaresto.
Hindi na nakapalag si Mendez matapos na mabulaga sa mga operatiba kung saan agad itong isinailalim sa kustodya ng pulisya.
Sa pinakahuling update, nabatid na pinalaya na kagabi si Mendez matapos itong maglagak ng piyansa na tig- P120,000 sa bawat isang kaso o kabuuang P360,000.