MANILA, Philippines - Pinaiimbestigahan ng embahada ng Korea sa Pasay City Police ang umano’y pagkawala ng isa nilang kababayan sa naturang lungsod.
Ayon kay Police Chief Inspector Rolando Baula, hepe ng Station Investigation and Detective Management Branch (SIDMB), Pasay City Police, sumulat sa kanila ang Koean Embassy hinggil sa pagkawala ni Chang Hun Lee, pansamantalang nanunuluyan sa isang condominium sa Leveriza St., Brgy. 24 ng naturang siyudad.
Nabatid na noon pang Marso 15 ng taong kasalukuyan iniulat na nawawala si Lee.
Sa ngayon ay hindi na makontak ng Pasay City Police ang taong unang nagbigay ng impormasyon hinggil sa pagkawala ni Lee.
Gayunpaman, nangako ang Pasay City Police sa Korean Embassy, na gagawin nila ang lahat upang matunton ang kinaroroonan ng naturang dayuhan.