MANILA, Philippines – Nasawi ang isang lalaki makaraang mabaril ng mga tauhan ng Caloocan City Police nang hindi makontrol sa umano’y pag-aamok nito, kahapon ng umaga sa naturang lungsod.
Nakilala ang nasawi na si Saidamen Macapantong, 29, ng Phase 12 Brgy. 188 Tala, ng naturang lungsod.
Sa ulat, sinabi ni Police Community Precinct 4 head, Insp. Henry Taule na nagpapatrulya sila sa lugar dakong alas- 9:20 ng umaga nang lumapit ang ina ni Macapantong at humingi ng saklolo sa ginagawang pagwawala nito.
Kasama ang mga tauhan ng Special Reaction Unit (SRU), rumesponde ang mga pulis at inabutan na nagpapaputok ng kalibre .9mm na baril sa ere ang suspek at hinahamon ang lahat ng away.
Nang pasukuin, akmang babarilin umano ng suspek ang mga pulis sanhi para paputukan na ito ng mga otoridad dahilan ng agad nitong kamatayan.
Narekober ng mga tauhan ng Scene of the Crime Operatives (SOCO) ang anim na basyo ng bala ng kalibre .9mm pistol na gamit ng nasawi at mga bala ng M-16 rifles at 12-gauge shotgun na gamit naman ng mga pulis.
Hindi naman na ipinasailalim ng mga kaanak ng nasawi ang bangkay nito dahil sa kanilang paniniwala sa relihiyon.