MANILA, Philippines – Isang 21-anyos na lalaki ang tinamaan ng ligaw na bala sa balikat habang namamasyal sa Luneta, Maynila kamakalawa ng gabi.
Gayunman, masuwerteng daplis lamang at agad ring pinauwi ng bahay mula sa Ospital ng Maynila ang biktimang si Ronald Paguinto, ng no. 36 TR Malonzo St., Pier 2, North Harbor, Tondo, Maynila.
Sa ulat, dakong alas- 11:23 ng gabi nang magulat na lamang ang biktima nang uminit ang kaniyang balikat at nakitang dumudugo na. Humingi siya ng tulong sa tourist police na nagdala sa kaniya sa ospital.
Namamasyal lamang umano ang biktima kasama ang mga kaibigan at habang bumibili siya ng mais nang matamaan ng bala.
Wala pang natutukoy na suspek na nagpaputok ng baril na tumama sa biktima.