MANILA, Philippines – Patay ang isang kilabot na holdaper at gumagamit ng droga matapos itong pagbabarilin ng hindi pa nakikilalang suspek kamakalawa sa Taguig City.
Dead on the spot ang biktimang si Alvin Orate “alias Am-bing”, 22, ng 7th St., Brgy. Katuparan ng naturang lungsod matapos na magtamo ng ilang tama ng bala sa iba’t ibang bahagi ng katawan buhat sa hindi pa batid na kalibre ng baril.
Blanko pa ang pulisya sa pagkakakilanlan ng suspek at nagsasagawa pa sila ng isang follow-up hinggil sa insidente.
Sa report na natanggap ni Police Sr. Supt. Felix Arthur Asis, hepe ng Taguig City Police, naganap ang insidente alas-3:00 ng hapon sa Block 1, Sitio Pusawan, Brgy. Ususan ng naturang lungsod.
Habang nakatayo ang biktima sa naturang lugar ay biglang sumulpot ang hindi kilalang suspek at walang salitang pinagbabaril si Orate na naging dahilan ng agaran nitong kamatayan.
Matapos ang pamamaril ay mabilis namang tumakas ang suspek at sa nakalap na impormasyon ng pulisya, nabatid na ang biktima ay isa umanong kilabot na holdaper at gu-magamit ng droga.
Iniimbestigahan na ng pulisya, kung may kinalaman sa iligal na gawain ng biktima ang naganap na pagpaslang dito.