MANILA, Philippines - Isang rider ang nasawi habang sugatan ang kaangkas nitong babae matapos na sumalpok sa isang poste sa Brgy. Jesus dela Peña sa Marikina City, kahapon ng umaga. Matinding pinsala sa ulo at katawan ang agarang ikinasawi ng rider na si Rommel Romero, residente ng Brgy. Mayamot, Antipolo City. Ginagamot naman sa Amang Rodriguez Medical Center ang kaangkas ng biktima na si Tricia Santos, na nagtamo rin ng matinding pinsala sa katawan dahil sa aksidente. Batay sa ulat ng Marikina City Police, dakong alas-7:00 ng umaga nang maganap ang aksidente sa A. Bonifacio Avenue ng Brgy. Jesus dela Peña sa lungsod. Sinasabing nawalan ng kontrol ang rider sa kanyang motorsiklo sanhi upang bumangga ito sa poste ng Meralco.