MANILA, Philippines - Agaw-buhay ang isang obrero matapos itong pagtripang saksakin ng lalaking bangag sa droga na nakatinginan lamang nito sa Navotas City, kahapon ng madaling araw.
Ginagamot sa Tondo Medical Center sanhi ng dalawang saksak sa likod ang biktima na nakilalang si Manny Malupa, 30, ng Area 4, Dalagang Bukid ng naturang lungsod.
Pinaghahanap naman ng pulisya ang suspek na si alyas Arjay, taga - Malabon City.
Ayon sa pagsisiyasat ni SPO1 Noli Dait, ng Navotas City Police, naganap ang insidente ala-1:00 ng madaling araw sa Block 26, Area 1, Brgy. North Bay Boulevard South (NBBS) ng nasabing lungsod.
Kasalukuyang inaayos ng biktima ang kanyang motorsiklo sa nasabing lugar nang makatinginan nito ang bangag sa droga na suspek hanggang sa nilapitan siya nito.
Walang salitang sinaksak ang biktima ng suspek at pagkatapos ay mabilis na tumakas.
Habang ilang nakasaksi naman sa insidente ang nagdala sa biktima sa naturang pagamutan.