MANILA, Philippines – Isang 4-anyos na batang babae ang dinukot ng limang armadong kalalakihan sa Sampaloc, Maynila kamakalawa ng gabi.
Sa ipinadalang report ng Sampaloc Police Station, itinago ang biktima sa pangalang Jenjen, ng Olongapo City habang tinutunton na ngayon ang mga suspek.
Sa salaysay ni Katrine, ina ng biktima, alas-8:45 ng gabi nang tangayin ng limang suspek ang kanyang anak.
Sakay aniya ng isang kulay maroon na Toyota Revo (WBY 401) ang mga suspek nang sapilitang kunin ang bata.
Nabatid na katatapos lamang kumain ng mag-ina sa isang fastfood chain sa Bustillos St., Sampaloc at nasa labas na sila nang huminto sa kanilang tapat ang sasakyan ng mga salarin.
Pagtapat umano sa kanilang harapan ay bumaba ang mga suspek at tinutukan siya ng baril saka binuhat ang kanyang anak at isinakay sa naturang SUV.
Hindi rin matukoy ng ginang ang motibo sa pagdukot sa bata, at aniya ay hindi naman tumatawag ang mga suspek sa kanilang pamilya.