MANILA, Philippines – Nagsagawa kahapon ng ‘market holiday’ ang mga vendors mula sa pitong palengke sa Maynila na isinailalim sa joint venture agreement kasunod ang pagrarally sa harap ng Manila City hall.
Iginigiit ng mga vendors ang kanilang pangamba na tumaas ang kanilang upa at magbago ang pamamahala sa mga palengke. Kabilang sa mga palengke na isasailalim sa joint venture ay ang Pritil, Sampaloc, Trabajo, Quinta, Dagonoy, San Andres at Sta Ana.
Tinututulan din ng grupo ang Manila City Council Ordinance 8346 na nagbibigay kapangyarihan kay Estrada na pumasok sa kasunduan sa mga private sector para sa pagsasapribado ng mga pampublikong pamilihan sa lungsod.
Maaga pa lamang ay nagsimula ng magtipon sa kanto ng United Nations Avenue at Taft Avenue ang mga vendor na mula sa Sampaloc, Trabajo, Quinta, Pritil, Dagonoy, San Andres at Sta Ana Public Markets para sa kanilang ikinasang market holiday. Alas-6:00 pa lamang ng umaga, sarado na ang mga tindahan na tumagal hanggang alas-12:00 ng hatinggabi.
Mula sa UN Avenue ay umusad ang mga miyembro ng bagong tatag na alyansa ng mga market vendors na tinawag na ‘Save Manila Public Market Alliance (SAMPAL)’.
Ala-1:30 ng hapon nang personal naman kausapin ni Estrada ang mga vendors upang bigyan ng linaw ang ilang mga isyu. Bagama’t bahagyang nagkaroon ng tensiyon sa loob ng Bulwagang Villegas kung saan inilabas ng mga lider ng vendors ang kanilang mga kahilingan habang ipinatutupad ang joint venture.
Kahapon ay pinagbigyan in Estrada ang hiling ng Quinta Market na alisin na ang upa sa kanilang relocation site habang sumasailalim sa redevelopment ang nasabing palengke. Ayon sa mga vendors, wala umano silang kinikita matapos silang ilipat sa relocation site. Malaking bagay din ang P40 kada araw na bayad ng mga vendor.
Tiniyak din ni Estrada sa mga taga Sta. Ana Market na hindi gigibain ang nasabing palengke at sa halip at ire-renovate lamang ito upang mas dayuhin ng mga mamimili. Idiniin ng grupo na hindi sila tutol sa pagbabago ngunit umapela silang huwag isapribado ang kanilang puwesto sa palengke dahil tiyak na tataas ang renta nila sa mga ito.
Sinabi naman ni Atty. Edward Serapio, Secretary to the Mayor, na protektado ng city government ang mga vendors kaya’t wala umanong dapat na ipangamba ang mga ito. Aniya, mananatiling kontrolado ng city government ang mga pamilihan sa Maynila.