MANILA, Philippines – Patay sa mga hired killer ang isang retiradong pulis Maynila matapos na pagbabarilin sa loob mismo ng kanyang pinapasadang AUV kahapon ng umaga sa Tondo, Maynila.
Dead on the spot si SPO1 Salvador Legaspi, ng Asuncion St. Tondo, Maynila at kasalukuyan ring barangay kagawad sa Brgy. 47 Zone 3.
Nagsasagawa naman ng follow up operation ang mga tauhan ng Manila Police District laban sa pitong kalalakihan na nagpanggap na mga pasahero ng biktima. Sinasabing ang gunman ay nasa edad 20 hanggang 30-anyos at nakasuot ng kulay itim na t-shirt at short at naka -bull cap ng kulay itim.
Sa inisyal na imbestigas-yon ni SPO2 Donald Panaligan ng Manila Police District-Homicide Section, bandang alas-8:15 ng umaga, nang maganap ang pamamaril sa panulukan ng Moriones at Road 10 sa Tondo.
Kasalukuyang nagmamasada ang biktima dala ang kanyang puting Nis- san Urvan (ZNT-843) patungong Ayala, Makati at habang nagtatawag naman ng pasahero ang isang Ernesto Alapide ay duma-ting ang apat na lalaki at sabay-sabay na sumakay at pumuwesto sa likod ng driver seat.
Dahil sa utos ng misis ni Legaspi na huwag magpasakay ng lalaki sa gitna, pinalipat ni Alapide ang mga lalaki sa likod na agad namang sumunod maliban sa gunman na naka-bull cap.
Dito na dumating ang tatlo pang lalaki na sumakay sa hulihan, hanggang sa mapuno. Ilang minuto pa lamang ang nakararaan ay biglang pinaputukan ng gunman si Legaspi at sabay-sabay na nagpulasan ang iba pang pasahero.
Naglakad lamang papalayo ang mga suspek at nang makakita ng isang pampasaherong jeep na biyaheng Ilaya–Dagat Dagatan ay pinara ito at doon sumakay papatakas.
Ayon naman kay Insp.Paul Dennis Javier, hepe ng Homicide Section, may lead na sila kung saan kita sa Closed Circuit Television (CCTV) ang naganap na krimen.
Isa aniya sa pinagtutuunan ng pansin ngayon ay ang pagiging pangulo ng biktima ng samahan ng mga driver at operator sa lugar.