MANILA, Philippines – Nasa malubhang kalagayan ang isang negosyante makaraang pagbabarilin ng dalawang lalaki na hinihinalang “gun-for-hire” sa tapat ng kanyang bahay sa Valenzuela City, kamakalawa ng gabi. Isinugod sa Fatima Medical Center ang biktimang si Fortunato Salazar, 49, ng Salazar St., Brgy. Parada, ng naturang lungsod kung saan ito ginagamot. Sa ulat, sakay ang biktima ng kanyang Mitsubishi Montero kasama ang kanyang misis, bayaw na si Jeffrey Reyes at hipag at kararating lang ng kanyang bahay dakong alas-9 ng gabi. Unang bumaba ng kotse ang biktima upang isara ang gate nang sumulpot ang dalawang salarin at agad siyang pagbabarilin. Nagawa namang makatakbo ng biktima at makapagtago sa loob ng sasakyan ngunit isa sa mga salarin ang sumunod at muli siyang pinaputukan sa katawan bago tumakas gamit ang isang motorsiklo. Mabilis namang naisugod ng mga kaanak ang biktima sa nabanggit na pagamutan habang nagsagawa ng follow-up operation ang mga tauhan ng Police Community Precinct 12 ngunit bigo na masakote ang mga salarin. Patuloy ang imbestigasyon sa kaso upang mabatid ang motibo sa tangkang pamamaslang at makakuha ng lead para maresolba ang krimen.