MANILA, Philippines - Pinaslang ng mga hindi pa nakilalang salarin ang isang lalaki na sangkot umano sa pagtutulak ng iligal na droga nang pagbabarilin sa loob mismo ng kanyang bahay sa Malabon City.
Nakilala ang nasawi na si Enrico Juance, 48, ng Kaunlaran St., Brgy. Muzon, ng naturang lungsod. Hindi naman ginalaw ng mga salarin ang live-in partner nito na si Rowena Jordan.
Sa ulat, dakong alas-10:15 ng gabi nang pasukin ng mga suspect ang bahay ni Juance. Isa ang agad na bumaril sa biktima na tinamaan sa ulo at katawan habang nagsilbing look-out naman ang isa pa.
Muling nabigo naman ang pulisya na madakip ang mga salarin. Narekober naman sa loob ng bahay ng suspek ang 10 basyong bala ng hindi pa mabatid na kalibre ng baril at 10 maliit na pakete na naglalaman ng hinihinalang shabu.
Nabatid na kasama sa watchlist sa mga pinaghihinalaang tulak ng iligal na droga ang biktima habang maaring onsehan ang dahilan ng pamamaslang.