MANILA, Philippines – Arestado ang isang 40-anyos na bebot matapos itong makumpiskahan ng shabu na nakalagay sa kanyang ari habang dadalawin nito ang kanyang kinakasama na isang preso sa Pasay City Jail (PCJ), kamakalawa. Kinilala ni PCJ warden, Supt. Baby Noel P. Montalvo ang suspek na si Jennifer Belda, residente ng Sucat Parañaque City.
Lumalabas sa imbestigasyon, alas-2:00 ng hapon nang dumalaw ang suspek sa live-in partner nitong si Antonio Samson, na nasa dormitory 9 ng naturang kulungan. Bago pinayagang pumasok ng kulungan ang suspek, SOP munang kapkapan ito.
Nang kapkapan ng isang babaeng jail officer, napansin na may bumubukol sa bandang ari nito. Kung kaya’t kaagad itong siniyasat at nakita dito ang isang kulay berde na papel na naglalaman ng shabu.
Kaagad kinumpiska ng mga jail officer ang naturang kontrabando, sabay na inaresto si Belda. Dahil sa insidente, pansamantala munang sinuspinde ng pamunuan ng Bureau of Jail Management and Penology (BJMP) ang dalaw sa naturang kulungan.