MANILA, Philippines - Utas ang isang teacher at sugatan naman ang misis nito matapos looban ang bahay ng mga ito ng isang kawatan, kahapon sa Muntinlupa City.
Dead-on-arrival sa Muntinlupa General Hospital ang biktimang si Jesus Arandia, 30, ng Lakeview Homes ng naturang lungsod sanhi ng tinamo nitong tatlong saksak sa leeg at sa dibdib. Ginagamot naman sa nabanggit na ospital ang misis nitong si Keisha, 25, isa ring teacher na nagtamo naman ng saksak sa tiyan.
Kinilala naman ang suspek na sa pamamagitan ng photo gallery ng Muntinlupa City Police, na si Jeffrey Magnaye, 26, naninirahan din sa nasabing lugar.
Ayon kay Senior Supt. Allan Nobleza, hepe ng Muntinlupa City Police, naganap ang insidente alas-5:39 ng umaga sa inuupahang apartment ng mag-asawa sa Lakeview Homes.
Matapos na duguang bumulagta ang mag-asawa ay mabilis na tumakas ang suspek at inaalam pa ng pulisya kung magkano ang natangay nito.
Samantala, sa isang follow-up operation ng mga kagawad ng Muntinlupa City Police, nadakip ang suspek sa mga kamag-anak nito sa Lemery, Batangas.