MANILA, Philippines – Nasa kritikal na kondisyon ang isang 44-anyos na ama makaraang pagbabarilin ng dalawang hindi pa nakikilalang lalaki nang tumangging ituro nito ang kinaroroonan ng kanyang anak na hinahanap ng mga suspek sa Pasig City, kahapon ng madaling-araw.
Ang biktima ay ginagamot ngayon sa Rizal Medical Center sanhi ng tinamong tama ng bala sa iba’t ibang bahagi ng kanyang katawan ay nakilalang si Larry Colase, fruit vendor, ng E. Santos St., Brgy. Palatiw, sa lungsod.
Sa imbestigasyon ng pulisya, nabatid na ang insidente ay naganap dakong ala-1:00 ng madaling-araw sa loob ng bahay ng biktima.
Kasalukuyang natutulog ang biktima nang magising dahil sapilitang pumasok sa kanyang bahay ang dalawang armadong suspek at hinahanap ang kanyang anak na si Miguel Colase. Nang tumanggi ang biktima na ituro kung nasaan ang kanyang anak ay siya mismo ang pinagdiskitahang pagbabarilin ng mga suspect.
Sa kabila ng mga tama ng bala sa katawan ay nagawa pang makatakbo at makalabas ng tahanan at humingi ng saklolo sa ilang kapitbahay ang biktima na siyang nagsugod dito sa pagamutan.