MANILA, Philippines – Tatlong sasakyan ang natangay ng mga karnaper sa loob lamang ng limang oras na naganap sa magkahiwalay na lugar sa Pasig City at San Juan City, kamakalawa ng gabi.
Kabilang sa mga nakarnap na sasakyan ay isang L300 Mitsubishi pick-up (TMD-679) na pagmamay-ari ni Ma. Wilves Guillarte; isang Suzuki Raider (OW8216) at isang Suzuki raider (NC30052), na ang mga may-ari ay tumangging magpalathala ng kanilang pangalan.
Batay sa ulat ng mga awtoridad, unang nakarnap sa pagitan ng alas-4:00 ng hapon at alas-9:00 ng gabi ang dalawang Suzuki Raider habang nakaparada sa Brgy. Maybunga at Brgy. Palatiw sa Pasig City.
Dakong alas-9:00 naman ng gabi nang sumunod na makarnap ang pick-up habang nakaparada sa Hardboard St., corner P. Guevarra St. sa San Juan City.
Ipinarada lamang ng mga may-ari ang kanilang mga behikulo sa mga naturang lugar ngunit nang balikan ay wala na ang mga ito.
Iniimbestigahan naman ng mga awtoridad ang insidente para sa posibilidad na mabawi ang mga behikulo at maaresto ang may kagagawan ng pangangarnap sa mga ito.