MANILA, Philippines - Isang 29-anyos na obrero ang nagpakamatay sa pamamagitan ng pagbigti sa kanyang sarili matapos na umano’y hindi matanggap na iwan ng kanyang asawa sa lungsod Quezon, iniulat kahapon. Ayon kay PO2 Jogene Hernandez, nakilala ang nasawi na si Marlon Bautista, residente sa Brgy. UP Diliman ng nasabing lungsod. Sabi ni Hernandez, ang biktima ay nadiskubre ng walong taong gulang nitong anak na babae habang nakabitin gamit ang nylon cord sa kisame ng kanilang bahay, ganap na alas- 11 ng umaga. Isinugod pa ang biktima sa Labor hospital, pero hindi na rin umabot pa ng buhay. Dagdag ni Hernandez, kaya umano umalis ng kanilang bahay ang misis ng nasawi ay dahil sa pananakit ng huli lalu na kapag sila ay nag-aaway. Posibleng ito umano ang dahilan kaya nagpasya ang mister na magpakamatay sa akalang hindi na babalikan ng asawa. Patuloy naman ang pagsisiyasat ng awtoridad sa nasabing insidente.