MANILA, Philippines - Utas ang isang Bangladesh national makaraang tambangan ng riding-in-tandem suspect habang sakay ng kanyang Toyota Fortuner sa kahabaan ng Kamias Road, lungsod Quezon, kahapon ng umaga.
Sa inisyal na ulat ng Quezon City Police Station 9, nakilala ang biktima na si Anizur Raman, 48, na agad na nasawi sa lugar dahil sa tinamong mga tama ng bala sa ulo.
Agad namang sumibat papalayo sa lugar ang mga suspect sakay ng isang motorsiklo, patungo sa hindi mabatid na direksyon.
Nangyari ang insidente pasado alas-12 ng tanghali sa may Kamias Road, malapit sa kanto ng Kasing-kasing St., Brgy. West Kamias sa lungsod.
Diumano, minamaneho ng biktima ang kanyang Toyota Fortuner at tinatahak ang nasabing lugar nang huminto makaraang abutan ng stop light sa Kalayaan St. Doon na biglang sumulpot ang mga suspect sakay ng isang motorsiklo saka pinagbabaril ang biktima.
Sinasabing umarangkada pa ang sasakyan ng biktima, matapos na ito’y pagbabarilin pero bumangga na ito sa isa pang sasakyan pagsapit sa Kasing-kasing St., matapos malagutan ng hininga.
Sa kasalukuyan, nagsasagawa na ng pagsisiyasat ang Quezon City Police District-Criminal Investigation and Detection Unit (QCPD-CIDU) sa nasabing insidente.