MANILA, Philippines – Onsehan sa droga ang isa sa mga tinitignang motibo ng pagpatay sa isang lalaki kamakalawa ng gabi sa Parola Compound, Tondo, Manila.
Kinilala ni Supt. Jackson Tuliao, hepe ng Manila Police District- Moriones Station ang biktima na si Mark Evan Sebastian, 24, naninirahan sa Gate 12, Area B Parola Compound, Tondo, Manila.
Batay sa imbestigasyon, naganap ang insidente dakong alas-8:30 kamakalawa ng gabi sa Gate 13, Area B Parola Compound.
Nabatid na nakatayo ang biktima sa may Gate 13 sa Parola nang lapitan ng hindi nakikilalang suspect at pagbabarilin ang una.
Nagtamo ng tama ng bala ng baril sa kaliwang mata at dibdib si Sebastian. Hinala ng pulisya posibleng may kinalaman sa droga ang pagpaslang dito.