MANILA, Philippines - Dalawang pinaniniwalaang drug dealer ang nadakip sa magkahiwalay na buy-bust operation na isinagawa sa Muntinlupa City kamakalawa.
Nakakulong sa Muntinlupa City Police detention cell ang mga suspek na sina Ramil Unisa “Gubat” Islan, ng Brgy. Putatan at Michelle Bunda “Bambam” Ramos, ng Brgy. Poblacion, kapwa ng nasabing lungsod.
Nabatid na nakatanggap ng reklamo mula sa ilang concerned citizen ang tanggapan ni Muntinlupa City Mayor Jaime Fresnedi hinggil sa illegal na operasyon ng mga suspek.
Dahil dito, agad na inatasan nito si Senior Supt. Allan Nobleza, hepe ng Pasay City Police na maglunsad ng operasyon laban sa mga suspek. Kamakalawa ay naglatag ng magkakahiwalay na buy-bust operation ang mga pulis laban sa mga suspek, na nagresulta sa pagkakadakip sa mga ito.
Nakumpiska mula sa mga suspek ang ilang plastic sachet na pinaniniwalaang shabu.