MANILA, Philippines – Bulagta ang isang lalaki makaraang pagbabarilin ng hindi nakikilalang suspect lulan ng motorsiklo kamakalawa ng hapon sa Navotas City.
Nakilala ang biktima na si Danilo Garganta, 36, ng Champaca St., Brgy. San Roque ng nasabing lungsod sanhi ng tinamong limang tama ng bala sa iba’t ibang bahagi ng katawan.
Narekober sa bulsa nito ang isang plastic sachet na naglalaman ng pinaniniwalaang shabu at limang basyo ng bala.
Batay sa ulat ni PO3 Ronnie Garan, ng Navotas City Police, naganap ang insidente alas-2:30 ng hapon sa kahabaan ng Kapalaran Uno, Brgy. San Roque ng nasabing siyudad.
Nabatid na naglalakad ang biktima sa nasabing lugar, nang tabihan ito ng isang motorsiklo na walang plaka at walang sabi-sabing pinagbabaril na naging dahilan ng agaran nitong kamatayan.
Matapos ang pamamaril ay mabilis na tumakas ang suspek at iniwang nakabulagta, duguan at walang buhay ang biktima.
Patuloy ang isinagawang imbestigasyon ng mga awtoridad kung may kinalaman sa onsehan sa droga ang motibo sa nasabing insidente.