MANILA, Philippines – Patay ang isang 42-anyos na lalaki na pasimuno umano ng pagkakabit ng iligal na koneksiyon ng kuryente makaraang barilin nang malapitan sa ulo ng isang hindi pa nakikilalang salarin, kamakalawa ng tanghali sa Malabon City.
Nakilala ang nasawi na si Romel Alfante, alyas “Galis”, at residente ng Block 2 Kadima St., Letre, ng naturang lungsod.
Sa ulat ng pulisya, nasa harapan ng kanyang bahay ang biktima dakong alas-12:30 ng hapon nang sumulpot ang hindi nakilalang salarin at biglang paputukan ng baril ang biktima sa ulo. Kaswal na tumakas lamang palayo ang salarin makaraan ang pamamaril habang hindi na naisugod sa pagamutan ang biktima.
Sa imbestigasyon, lumalabas na dati na umanong may kasong kriminal ang biktima dahil sa pagkakabit ng jumper sa kanilang lugar.
Ipinapalagay rin na posibleng may kinalaman sa iligal na droga ang pamamaslang dahil sa kilalang sangkot rin sa pagtutulak ang biktima at ang kinakasama nito.
Narekober sa lugar ng krimen ang isang slug ng hindi pa mabatid na baril habang dinala ang bangkay sa Nate Funeral Homes.