MANILA, Philippines - Patay ang 35-anyos na mister dahil sa pinsala sa ulo matapos sumemplang ang minamanehong motorsiklo na walang helmet kamakalawa ng madaling-araw sa Valenzuela City. Kinilala ng pulisya ang biktima na si Ramonito Magalang, maintenance boy at nakatira sa #17 Malinis St., Brgy. Lawang Bato sa naturang lungsod. Sa ulat ng pulisya, binabagtas ng biktima ang kahabaan ng Maysan Road noong Huwebes ng madaling-araw nang maganap ang aksidente. Bigla umanong nawalan ng kontrol sa manibela ang biktima at tumama sa gutter sa tapat ng waiting shed ang motorsiklo kaya ito sumemplang. Tumama sa semento ang ulo ni Magalang kaya agad itong namatay. (Danilo Garcia)