MANILA, Philippines - Sugatan ang isang pulis matapos tamaan ng ligaw na bala sa lungsod ng Quezon sa pagsalubong ng Bagong Taon.
Isinugod si Police Officer 1 Puut Piya, 36, nakatalaga sa Regional Police Holding and Accounting Unit, sa FEU Hospital matapos tamaan ng ligaw na bala sa kaliwang paa.
Ayon sa inisyal na imbestigasyon, pauwi na si Piya lulan ng motorsiklo nang tamaan ng ligaw na bala sa Litex Road, Barangay Commonwealth, Quezon City noong Disyembre 30 bandang 1:30 ng madaling araw.
Nakarinig si Piya ng putok ng mga baril bago namalayang dumurugo ang kanyang paa.
Inaalam pa ng mga awtoridad kung sino ang nagpaputok ng baril.