MANILA, Philippines – Halos lumaylay ang ulo ng isang security guard nang tagpasin ng isang construction worker ang leeg nito, matapos umanong sawayin ng una sa inuman ang huli sa construction site sa Sta. Cruz, iniulat ng pulisya.
Kasalukuyang inoobserbahan sa Justice Jose Abad Santos General Hospital (JJASGH), ang biktimang si Ardy Fernandez, ng Michael Lo Building sa 938 Espeleta St. Sta.Cruz, Manila.
Agad namang nadakip ang suspek na si Rosendo Estellore, 37, tubong-Nabangga, Bohol, nang magsagawa ng follow-up operation ang mga tauhan ni P/Supt. Aldrine Gran, Station Commander ng Manila Police District-Sta. Cruz Police Station 3.
Batay sa ulat ni SPO4 Armando Licayan, naganap ang insidente dakong ala-1:30 ng hapon matapos sawayin at pagbawalan ng biktima ang suspek at iba pang kasama nitong construction worker na huwag mag-inuman sa loob ng ginagawa nilang gusali.
Pansamantalang umalis ang suspek at pagkaraan ng ilang minuto ay bumalik ito at walang sabi-sabing tinaga sa batok ang nasabing sekyu.
Mabilis na tumakas ang suspek subalit hindi naman nag-aksaya ng panahon ang tauhan ni Gran at naaresto si Estellore.