MANILA, Philippines - Inilarga na ng Philippine National Police (PNP) ang pagpapatupad ng 24/7 oras ng checkpoint operations sa Metro Manila upang bigyang proteksyon ang mamamayan partikular na ngayong ‘holiday rush’ kaugnay ng nalalapit na Pasko at Bagong Taon.
Ayon kay Deputy Director General Marcelo Garbo, ang 24 oras na checkpoint sa MM ay isusuperbisa ni National Capital Region Police Office (NCRPO) Director Carmelo Valmoria partikular na sa mga istratehikong lugar sa Metro Manila na madalas pangyarihan ng krimen.
Samantalang bukod sa mga motorsiklo na sinasakyan ng mga riding in tandem ay isasalang rin sa mahigpit na checkpoint ang mga taxi na bumibiyahe sa Metro Manila bunga ng mga insidente ng panghoholdap ng mga taxi driver sa kanilang mga pasahero.
Gayundin mahigpit ring iinspeksyunin sa checkpoint ang mga pampasaherong van na bumibiyahe sa iba’t-ibang panig ng Metro Manila na karaniwan ng target ng mga holdaper.
Kabilang rin sa pokus ng checkpoint ay ang mga van for rent na umano’y ginagamit ng mga kidnappers na bumibiktima ng mga kabataan partikular na ang mga tinedyer at bata.
Samantalang tinagubilinan rin ni Garbo ang mga pulis na magpapatupad ng checkpoint na maging magalang sa paninita sa mga checkpoint upang hindi ito magdulot ng takot sa mga pasahero.
Idinagdag pa nito na ang mga pulis na magpapatupad ng checkpoint ay dapat na nakasuot ng kumpletong uniporme.