MANILA, Philippines – Nadakip na ng mga tauhan ng Manila Police District (MPD) ang pangunahing suspek sa panghoholdap at pamamaril na nagresulta sa pagkasugat sa staff ni Senator Joseph Victor Ejercito noong nakaraang linggo.
Ayon kay MPD Director Senior Supt. Rolando Nana, naaresto sa follow up operation ng MPD-Station 5, bandang alas-2 ng hapon si Emil Joseph Dianela, 22, sa kanyang pinagtataguan sa Pedro Gil St., Paco, Maynila.
Si Dianela na itinuturong nangholdap, bumaril at nakasugat sa biktimang si Kathlyn Mary Ann Tan noong Disyembre 3 sa Quirino Avenue, Benitez St. sa Malate ay iprinisinta rin kahapon sa tanggapan ni Senator JV Ejercito.
Personal naman na itinuro ng dalawang staff na biktima ang suspect na halos umiiyak pa sa pagtanggi sa krimen.
Inihayag pa ng suspect na nagtitinda lamang siya ng sigarilyo sa Paco, Maynila noong oras na sinasabing naganap ang krimen.