MANILA, Philippines - Patay ang isang 14-anyos na high school student nang magbigti sa loob ng kanilang bahay sa Navotas City, kahapon ng madaling-araw.
Hindi na nakarating ng buhay sa Pagamutan Bayan ng Malabon ang biktimang si Eduardo Martin Manguni, ng Tanza National High School at residente ng Carville Subdivision, Brgy. Tanza ng nasabing lungsod.
Batay sa isinagawang imbestigasyon ni PO2 Allan Bangayan, ng Navotas City Police, alas-12:10 ng madaling-araw nang makita ng kanyang nakatatandang kapatid na si Edgar John ang nasawi na nakabigti ng tela sa ikalawang palapag ng kanilang bahay sa naturang lugar.
Agad itong humingi ng tulong sa mga magulang at pinagtulungan kalasin sa pagkakabigti ng kapatid bago mabilis na dinala sa nasabing pagamutan subalit, hindi na rin ito umabot ng buhay.
Hindi pa rin malinaw sa mga pulis kung ano ang dahilan ng biktima sa pagpapakamatay kung saan ayaw na ng pamilya na isailalim sa autopsy ang bangkay nito.
Naniniwala ang mga ito na walang naganap na foul play sa nasabing insidente.