MANILA, Philippines - Nagpakamatay sa pamamagitan ng pagtalon mula sa ika-45 palapag ng isang condominium ang apo ni dating Manila Mayor at ngayon ay Congressman Lito Atienza, kamakalawa ng hapon sa Makati City.
Dead-on-the-spot ang biktimang si Andrea Georgia “Adi” Atienza Beltran, 18, dalaga, ng West Tower 1 Condominium, 1 Rockwell Drive, Brgy. Poblacion ng naturang lungsod, estudyante ng Enderun Colleges, Global City, Taguig City.
Base sa report na nakarating sa Makati City Police, naganap ang insidente alas-3:00 ng hapon sa 45th floor ng West Tower Condominium sa nabanggit na lugar.
Napag-alaman na matinding depression umano ang dinanas ng biktima na sinasabing may tinataglay na karamdaman.
Sinabi pa sa ulat na matagal nang nagtatangkang magpapakamatay ang dalaga.
Nabatid na lumutang umano sa Makati City Police Headquarters noong Linggo (Agosto 3) si Rep. Atienza, dahil ang ina ng nasawi ay anak ng dating alkalde.
Tumanggi ang pamilya ng biktima na ipa-autopsy ang bangkay nito at tumanggi ring magsagawa ng imbestigasyon ang pulisya hinggil sa insidente.
Tinangka ng PSN na kunin ang pahayag ni Rep. Atienza pero tumanggi itong magbigay.