MANILA, Philippines - Isinilid sa loob ng drum ng mga hindi pa nakikilalang salarin ang bangkay ng isang lalaki na hinihinalang biktima ng salvage at iniwan sa gilid ng kalsada sa Malabon City, kahapon ng madaling araw.
Patuloy na inaalam pa ng pulisya ang pagkakakilanlan sa biktima na tinatayang nasa pagitan ng edad na 35-40 anyos, may tattoo na dragon sa magkabilang braso, may tattoo na “Tony Adriano” sa likod at nakasuot ng dilaw na sando at short pants.
Sa inisyal na ulat ng pulisya, dakong alas-4:30 ng madaling-araw nang matagpuan ng mga residente ng Mabolo Street, Brgy. Maysilo, ang naturang dram. Nadiskubre na bangkay ng lalaki ang nasa loob nito dahil sa umaagos na dugo.
Sa imbestigasyon ng Scene of the Crime Operatives (SOCO), natuklasan na may tama ng bala sa kaliwang leeg na tumagos sa mukha ang biktima.
Blangko naman ang pulisya sa posibleng pagkakakilanlan sa mga salarin dahil sa walang lumalantad upang magsilbing saksi sa insidente. Hinihinalang maaaring pinatay sa ibang lugar ang biktima at itinapon lamang sa naturang barangay upang iligaw ang mga awtoridad sa imbestigasyon.