MANILA, Philippines - Arestado ang tatlong ‘tulak’ ng droga sa magkakahiwalay na buy-bust operation na isinagawa sa Valenzuela at Malabon City kahapon.
Sa Valenzuela City, nakilala ang nadakip na suspek na si Jan Serben Pat, alias Kulas, 18, ng Sitio Cabatuhan ng naturang lungsod.
Nabatid na nakatanggap ng impormasyon ang mga pulis hinggil sa pagbebenta ng shabu ng suspek sa nasabing lugar na naging dahilan upang magsagawa ng buy-bust operation alas-10:00 ng umaga.
Nang iabot ng suspek ang isang sachet ng shabu kapalit ng P300 sa isang pulis na umaktong poseur buyer ay agad na dinamba ang binata kung saan nakuhanan pa ito ng tatlong sachet ng droga.
Samantala sa lungsod ng Malabon ay kapwa arestado rin ang mga ‘tulak’ na sina Reynaldo De Jesus, 40, at Jessie Igmasin, 23, kapwa ng Concepcion St., Brgy. Tugatog ng naturang lungsod.
Sa report ng Malabon City Police, nakatanggap sila ng reklamo hinggil sa talamak na bentahan ng droga sa naturang lugar.
Alas-3:20 kamakalawa ng hapon nang magsagawa ng buy-bust operation ang mga pulis kung saan naaresto ang dalawang suspect.