MANILA, Philippines - Patay ang isang pahinante habang nasa kritikal namang kondisyon ang driver nito nang saksakin ng dalawang hindi pa nakikilalang lalaki matapos pumalag ang mga biktima sa tangkang pagha-haydyak ng mga suspek sa dala nilang container van kahapon ng umaga sa Las Piñas City.
Dead-on-arrival sa Ospital ng Parañaque ang biktimang si William Batuga Biagcong, ng San Andres, Cainta, Rizal sanhi ng tinamong dalawang malalim na saksak sa katawan.
Samantala, ginagamot naman sa Zarate Medical Center ang driver na si Zandro Margallo, 34, driver ng Movers Forwarders, na ngayon ay nasa kritikal na kondisyon.
Sa inisyal na report na natanggap ni Senior Supt. Adolfo Samala Jr., hepe ng Las Piñas City Police, naÂganap ang insidente alas-5:20 ng umaga sa C5 Extension, Brgy. Manuyo Dos ng naturang lungsod.
Nabatid na minamaneho ni Margallo ang container van (RHT-107) at kalalabas lamang nila mula sa warehouse at hindi akalain na nakaabang sa kanila ang isa sa mga suspek na armado ng baril.
Tinutukan ang mga biktima at pinatigil ang dala nilang container van at tangka itong i-hijack ngunit nang papuputukan na ng suspek ang mga biktima ay hindi pumutok ang baril.
Nagkaroon ng pagkakataong pumalag ang mga biktima subalit hindi akalain ng mga ito na may kasama pala ang suspek na umatake ng saksak sa mga biktima.
Matapos isagawa ang pananaksak ay mabilis na tumakas ang dalawang suspek na nabigo sa tangkang pangha-haydyak. Nagsasagawa pa ng imbestigasyon ang pulisya hinggil sa insidente.