MANILA, Philippines - Hindi man kasali sa away, tinaga sa mukha at braso ang isang 37-anyos na vendor ng kaaway ng mga kaanak sa Happy Land, Tondo, Maynila, kamakalawa ng gabi.
Ginagamot sa Jose Reyes Memorial Medical Center (JRMMC) ang biktimang si Ronnel Asera, residente ng Yellow Bell St., Happy Land,Tondo.
Tinutugis pa ng mga awtoridad ang suspek na kinilalang si Jeffrey Villanueva, 36, ng Aroma Compound,Temporary Housing,Vitas, Tondo,Maynila at isang kinilala lamang sa alyas na Jojo Japon na residente rin ng Happy Land.
Sa ulat ni SPO4 Adonis Sugui, ng Manila Police District-Station 1, naganap ang insidente dakong alas-8:00 ng gabi habang naglalakad ang biktima pauwi sa kanilang bahay.
Walang kamalay-malay ang biktima na habang naglalakad ay may nagaganap na away sa pagitan ng kaanak at mga suspek. Bigla itong sinugod ng ilang kalalakihan na kaaway ng kaniyang mga kamag-anak, kung saan tinaga ang biktima sa mukha. Nang bumagsak ang biktima ay saka lamang tinantanan ng mga suspek at nagsitakas.